الحفره !

كان يا مكان .. كان فيه مواطن أسمه شريف .. كان يعمل " فواعلي " .. في يوم من الأيام .. كان يحفر حفره لماسوره الماء الجديده .. يحفر قليلا .. من ثم يرتاح قليلا .. عندما يرجع من راحته .. يجد ان كل ما حفره قد ردم .. استعان بالله و بدأ الحفر من جديد .. و عندما جاء وقت راحته .. دعي الله علي من يخرب عمله .. و لكن من الواضح ان الدعاء لم يكفي .. فقد خُرب عمله من جديد .. أخذ يدعو الله علي هذا المخرب الذي أفسد عمله .. و بدأ الحفر من جديد .. و من ثم عند وقت استراحته .. اختبأ وسط العشب .. و أنتظر ليري من الذي يخرب عمله .. انه .. شفيق .. التاجر المعروف في القريه .. و لكن لماذا يفعل ذلك .. بدأ شريف بالركض ليمسك شفيق .. و عندما حاول الأمساك به .. هرب بسرعه و أستنجد بالظابط ليحميه من البلطجي الذي يحاول سرقه امواله .. فأتهمه الظابط بزعزعه أستقرار القريه ..   و عندما رجع ألي بيته يجد العمده هناك و معه القرويين يتهمونه بتعطيل مصالحهم لأنه لم يحفر الماسوره في الوقت المحدد .. فقال وجدتها .. أذهب لشيخ القريه .. لعله يعينني هو ورجاله .. فوجد في المسجد نفس الأشخاص الذين يلقبونه بـ"ـمعطل الأنتاج " .. استعان بالله و صعد للشيخ علي المنبر .. و قال له .. يا شيخنا الكريم .. ان هناك من يخُرب عملي .. ماذا افعل معه .. قال .. انتبه الي عملك و كف عن ملاحقته .. يجب الأهتمام بالعمل و الأنتاج فهو عامود المجتمع و قدم أمرنا به رسول الله في حديثـ.. خلاص يا شيخنا قد وصلتني الرساله .. شكراً .. خرج شريف من المسجد منكس الرأس يدعو الله بأن ينصره .. و راح يحفر و يحفر .. !

كيف تحاور كنباوياً في 4 خطوات

عزيزي القارئ .. نرجو التأكد من سلامه مراره حضرتك قبل أن نخوض في أساليب التحدث مع الكنباويه .. كويس .. عليك ان تعلم عزيزي القارئ انك لو قريت المقال ده 100 مره لن تستطيع هزم كنباوي في نقاش عادل .. هذا المقال موضوع لحفظ ماء الوجه فقط امام القوه الفلسفيه الرهيبه للكنباويه .. فلو كنت ثوريا من الطراز الأول .. اقدر اضمنلك انك هتخرج من المناقشه و راسك تقمر عيش .. بعون الله نبدأ


-1 حافظ علي هدوءك 


لتعلم عزيزي المواطن .. ان الكنباوي موته و سمه حد يتنرفز عليه .. الكنباوي من طبعه مش حاسس بالأمان .. حتي الأن بيفكر خلع مبارك صح ولا غلط .. و دماغه بتودي و تجيب .. و لتعلم ايضا انه ميال للسلطه أكثر من الثوار .. فا خف عليه شويه .. لأنك ببساطه هتعتبر بلطجي مع أول نبره صوت عاليه .. 


2- أعلم انك تمثل صوره الثوره


تعرفو حاجه .. اسوء حاجه عملها الأعلام انه اما فشل انه يفهم الناس ان مافيش ثوره .. فهمهم انها ثوره سلميه .. فأياً كان الذي تناقشه .. فهو مقتنع اقتناعا تاما ان الثوره سلميه تماما .. و حاضر في ذهنه صور تبادل الورود و التصوير مع الدبابات .. و الأحتفالات برحيل مبارك .. و تنظيف الشوارع و كل الحاجات النضيفه ديه .. و اتفرمتت من دماغه كل صور الشهداء و الناس الي بتتداس بالعربيات و كأنها لم تكن .. فأنت هنا بتمثل صوره الثوره النضيفه الي هم يعرفوها .. لكن ما ان تبدأ حديثك عن الأمن المركزي و عصيانهم و المدراعات و ما الي ذلك .. سيعتبرك بلطجي فورا و كنت تعتدي علي قوات الأمن 


3- واجهه الكنباوي بما تستطيع اثباته 


أعلم ان الكنباوي لا يصدق أي شخص و أي حد " ثورجي " .. و الكنباوي يصدق ما يحب ان يصدقه .. مثلا اذ قلت له ان الشباب كانو يدهنون الأرصفه و يساعدون العجائز البارحه .. يا سلام .. شوف شباب الثوره .. فستجد قبول غير عادي من احزاب الكنبه علي الخبر المبهج و المفرح .. لكن اذ قلت له ان نفس الشباب كان يعتدي عليهم من قبل قوات الأمن .. لن يصدقوك .. واجههم دائما بالأثباتات .. بالدلائل .. بما رأيته بأم عينك 


4- الحلو و الوحش


سياسه الحلو و الوحش سياسه متبعه من قبل حزب الكنبه لسلخ أي سياسي فاسد من جميع اخطاءه .. عندما يأتي حديثك عن الفساد .. اضمنلك ان اكتر حمله هتسمعها .. " فيه حجات وحشه .. بس منقدرش ننكر الحاجات الحلوه ! " .. عندما بحثت عن اسباب ذلك .. وجت السبب الأصلي هو عدم الأطلاع .. فهؤلاء الذين يبررون سرقه مبارك .. بحمايته لبلده في حرب 73 - الي هي شغلته أصلا - .. هم اشخاص لم يرو في حياتهم أناساً يؤدون اعمالهم علي أكمل وجه .. أضرب لهم امثله بحكومات اجنبيه .. اضرب لهم امثله بأنظمه تعليم اجنبيه .. اضرب لهم امثالاً في أناساً يؤدون أعمالهم في أتم صوره ..


الأن عزيزي القارئ لقد أصبح في يديك الدليل الشامل في محاوره اي كنباوي .. نصيحه لله في الله .. ابعد عن الكنباويه هيشلًوك :))

صاحب بالين كداب .. و صاحب تلاته منافق .. و صاحب اربعه مصري !

من وجهه نظري .. النظام المصري السابق من أغبي أنظمه العالم .. و الحقيقه ان الفساد بالنسباله .. لم يكن غايه .. بل كان وسيله .. لو كان الفساد غايه .. لما وجدنا الأن مجموعه مثل شباب الألتراس الشجعان .. الي اما بيعدو من أي شارع " بيعدو من الشارع بتاعي علي فكره :D " و هما رايحين متش الناس كلها بتطلع تتفرج عليهم .. فلو كان الفساد غايه .. لكانت الحكومه أكثر ذكائاً .. ولتعلم عزيزي القارئ ان ليس هناك أمتع من صنع الفساد .. وليس هناك اسهل من التخطيط له .. لو أنك تريد الفساد للفساد .. لكنت جعلت الألتراس مثلا جماعه محظوره مع أول هتاف لهم ضدد الشرطه .. أه يا نظام لو كنت تعلم الغيب .. أعتقد أنك كنت رحت قتلت الثوار في بطن أمهاتهم قبل ما يتولدو .. لكن ربنا خلي فرعون يربي موسي في بيته .. بعد ما قتل كل الذكور بحثاً عنه .. الغريب في الأمر مش كده .. الغريب أن الناس فجأه .. تحول الألتراس الي عدوهم اللدود .. و السفاره التي تدمرت ديه .. سفاره الدوله الصدقيه و الحليف الأستراتيجي و العلاقات بتددمر و الحاجات العجيبه ديه .. الحقيقه انا مش قادر أفهم البشر دول .. كأن أحداً يضع لهم سم النفاق و تغيير الرأي يوميا في طعامهم .. أيخافون من كذب السلطه عليهم لهذه الدرجه .. اما زالو يؤمنون بخرافات " العماله " و " التدريب و التمويل " و " شباب الثوره المحترمين منزلوش الثوره اصلا اما عرفو انها عايزه تخلع مبارك " .. حقيقه المصريين تركيبه انسانيه غريبه .. تقدر تقول عليها الماده الخام للأنسان .. يعني حضرتك لو عايز تعمل أي تجارب عن السلوك البشري تعالي أعملها هنا في مصر .. قبل الثوره .. عايزين نشتغل .. بعد الثوره .. عايزين نشتغل .. الفرق ان الأولانيه كانت للبطاله .. معني كده ان مكانش حد لاقي شغل .. التانيه .. و بقدره قادر في خلال 18 يوم أنقلبت الأيه و كله عايز يشتغل و كله عنده شغل .. قبل الثوره .. عجله الأنتاج .. بعد الثوره .. عجله الأنتاج برده ! .. قبل الثوره الناس كانت بتقول ان مصر مافيهاش انتاج مصر بتستورد مصر عاجزه .. مصر جايبه جاز و مش مستحمله .. مصر مهدود حيلها .. بقدره قادر في خلال 18 يوم انقلبت الأيه برده .. و بقت مصر تنافس كوريا و اليابان و الصين و امريكا في الأنتاج و الصناعه و الزراعه و أحنا الي واقفين البلد و مش مخلينها تمشي .. قبل الثوره .. خربتو البلد .. بعد الثوره .. خربتو البلد .. و كأن الشعب المصري مهووس بالخراب .. فتلك قبل الثوره كان يسمعها نظيف أو غالي و هما جالسون و بيقولو " شويه الجرابيع دول هيعلمونا شغلنا " .. اما تلك بعد الثوره فيسمعها شاب طبيعي جدا يطالب بحقوقه فتأتي النتيجه عكسيه .. فلا يجد مفر من التظاهر و المطالبه بحقه ... فتأتيه اللكمات و الصعقات و الصفعات من كل مكان .. تلك من بلطجي و تلك من مواطن و تلك من جندي شرطه و تلك من عسكري جيش و تلك من الشرطه العسكري و تلك من راجل بدقن .. هنقول أيه غير .. صاحب بالين كداب .. و صاحب تلاته منافق .. و صاحب اربعه مصري ! 

لماذا يكره الناس الثوره ؟

قد تأتيك عزيزي القارء شويه هلاوس " من الي هيا " عن الثوره .. انا كشخص باصص للوضع من فوق .. شايف ان الوضع مش معقد زي ما انتو شايفينه .. ايه الي حصل يعني .. يوم 25 ناس ميجوش 0.1% من الشعب .. نزلو التحرير .. بعديها بيوم نزلت ناس من باقي المحافظات ..كان علي الجيش .. انه يتصرف بسرعه .. و عمل خطه حلوه .. خلي مبارك يماطل مع الشعب لحد ما يجيب اخرهم .. الخطوه ديه ليها اهداف  .. اول هدف يعرف اخر الناس ديه ايه .. رقم اتنين يدي لنفسه فرصه يخطط لمدي أبعد .. حطلنا الأول عمر سليمان و قال احتماليه انه يبقي الرئيس و كده .. و الناس عارفه ان ده رئيس المخابرات .. خلاهم يكرهوه و يطلبو الجيش بأديهم .. و جالهم الجيش .. احتفل بالثوره و عمل كل الخطوات المذكوره في مقال الدكتور علاء الأسواني " كيف تقضي علي الثوره " من استخدام الأعلام ليربط كل شيئ بالثوره .. فأصبح كل شيئ يحدث في العالم مرتبط بالثوره ,, قتل الجنود علي الحدود .. تفجير خطوط الغاز .. توتر العلاقات بينا و بين اسرائيل .. غلاء الاسعار .. خراب بشكل عام .. مع ان الخراب ده كان بيحصل بشكل دوري في النظام السابق .. لكن كانت الناس بتسكت عشان الي كانو بيعترضو عليه ده النظام القامع القذر .. لكن دلوقتي سبب الفوضي " كما مخيل ليهم " شويه شباب ممكن تلقبه بالأهوج أو الأحمق أو المخرب و الي يحب النبي يزود .. و علي المحور التاني كان فيه ناس تانيه ضدد الثوره اصلا .. يعني انا مشفتش ثوره في العالم فيها ناس ضدد الثوره اصلا !! هنا تحولت الثوره لوجه نظر يقابلها وجهه نظر تانيه .. ده المفروض ميحصلش .. الثوره المفروض شعور عارم بياخد العشب كله .. لكن ثورتنا مكانتش ثوره اصلا .. هنا فهمت وجهه نظر أحمد شفيق اما قال ديه مش ثوره اصلا .. ثوره ديه زي ليبيا كده .. لكن ديه كانت مجرد اعتراضات علي شخص الرئيس و قبيلته .. فكانت حدث يزول بزوال اسبابه .. و قد زاله اسبابه " الرئيس " فقد كان الهتاف الأول " الشعب يريد اسقاط النظام " عايزين اسقاط النظام .. نسقط النظام و فيها ايه .. لكن عاوزين تسقطوا الفساد .. علي جثتي .. 9-9 .. هنجيب جثتك 

نظره علي الناس و المجلس

• قاعد ممد علي السفينه الفضائيه بتاعتي .. بشرب الشاي الصيني الفضائي بتاعي .. بضرب بسكوت عيد الفطر الفضائي المخشب بتاعي .. و عايش الحياه .. بصيت كده نظره علي مصر .. بالتحديد شاب .. بيحاول يفهم الناس ان ثورتهم اتسرقت .. اكتشفت ان الشاب ده خد كميه ردود معاديه كتير أوي 
• 
  
• رقم 1 - يابني مش خلاص بقي .. انتو مش عملتو الثوره .. عايزننا نبقي زي ليبيا ولا ايه ؟؟
• رقم 2 - لا لمحاكمه الرئيس مبارك و جزمته علي رقبتنا .. و الجيش خط احمر
• رقم 3 - يحرررررم الخروج عن الحاكم العادل .. الجيش هو حمي الوطن و يحررررررررم الخروج عنه 
• 
  
• خدنا بصه علي كل واحد
• 
  
• من تحرياتي اكتشفت ان رقم 1 راجل متوسط الحال .. بيقدر يصرف علي نفسه و من فئه أهي مستوره و الحمد لله .. نوعا ما جبان .. محب للهدوء بشكل عام .. لا يري الفساد بل يري ان الغلط كله علي الشعب .. عنده كل حاجه فيها الحلو و الوحش .. تقولو الريس .. يقولك ليه حلو و ليه وحش .. تقوله الداخليه .. يقولك ليها حلو و ليها وحش .. تقوله المجلس .. يقولك حرام عليك خربت البلد !!
• 
  
• رقم 2 .. حتي الأن انا مش شايف وجهه نظر في الي هما بيقولوه ده خالص .. يعني الناس ديه بتعمل كده ليه .. انا مش فاهم مبارك ده بيحبووه ليييه ؟ .. يمكن كائنات فضائيه من كواكب تانيه ولا حاجه :)
• 
  
• رقم 3 .. انا مش فاهم برده مصلحته ايه انه يقول كده .. مع انه نزل في الثوره ,, و هو عارف كويس انا الثوره بتتسرق و لسه مكملتش .. يبقي ايه مصلحته انه يطلع سلاحه السري الأكثر فتكا " شرع ربنا و كلامه " و يطوعه و يأمر الناس بما نهي عنه الله " الزل و الخضوع و الفرجه علي الفساد " من هنا انا كشخص محايد اقول ان التيار الديني متحالف مع السلطه التي تحاول و بوضوح قتل الثوره 
• 
  
• عندي تعليق بس لرقم 1 : الحلو و والوحش ده اما تبقي مراتك .. امك .. اخوك .. حاجه خاصه بيك انت ومتعرفش تغيرها .. لكن اما يبقي رئيس دوله نغرفله اخطائه عشان ليه حاجه حلوه .. هو المفروض يبقي ايه اصلا ,, يعني انهي الاصل ,, الاصل انه يبقي زفت و اما يعمل حاجه حلوه نسقفله .. ولا انه يبقي كويس و اما يعمل حاجه زفت نطيره و نجيب واحد غيره .. مصر فيها الكثيرين القادرين علي تحمل المسؤوليه .. اما يبقي كل دول عندك و تفضل ماسك في شخص عشان ليه الحلو و الوحش .. يبقي انت للأسف شخص .. حماااار :)

انا شريف خالد .. مدون جديد .. ببص للدنيا نظره جديده .. نظره واحد جاي جديد علي البشر .. ميعرفهمش ولا يعرفوه .. بيفسر كل حاجه بيعملوها بأسلوب ساخر أوي ..